श्री
लीली सी घोड़ी राईबर,लीले गज री डोरी
दादोजी मुलावे,राईबर चढ़ो नी बछेरी
बाबाजी मुलावे राईबर,चढ़ो नि बछेरी
खम्मा खम्मा कर चढ़ ज्यो राईबर
घोड़ी है चमकालू,घोड़ी है चमकालू
राईबर बनड़ो है रिझालु
सांकडी गलियां म राईबर
पाग जतन कर राख ज्यो
देख बनी ए, जोय बनी ए,
बनड़ो किस्यो क फुटरो
सूरज सरिसो तेज़ राईबर
चांदे सरिसो निरमलो
पापड़ सरिसो पतलो राईबर
खाजा सरिसो खरखरो
दूधाँ र उफ़ान राईबर
दहियां सरिसो उजलो
मिश्री र मिठास राईबर
लांगा सरिसो चरचरो
धरती र धिमास राईबर
आबा सरिसो गरजनो
दादोजी रो पोतो राईबर
लागे घणो सुहावणो
बाबोजी रो बेटो राईबर
लागे घणो सुहावणो
काका ड़ो भतीजो राईबर
गलियाँ धूम मचावणो
भुआ रो भतीजो राईबर
गलियाँ धूम मचावणो
बेनडल्या रो बीरो राईबर
गलियाँ धूम मचावणो
नानाजी रो दोहितो राईबर
लागे घणो सुहावणो
मामा रो भाणेजो राईबर
गलियाँ धूम मचावणो
मासी जी रो भाणजो राईबर
गलियाँ धूम मचावणो
No comments:
Post a Comment