श्री
गऊ माता सांवरिया रो रूप, गऊ माता पूठरी घणी
जे कोई गऊ माता न हरियो चारो नीरे
बांरा हरिया भरिया खेत, गऊ माता पूठरी घणी
जे कोई गऊ माता न पाणी पिलावे
बांरा भरिया रे तालाब,गऊ माता पूठरी घणी
जे कोई गऊ माता न चुनड़ी ओढ़ावे
बांरा अमर सुहाग, गऊ माता पूठरी घणी
जे कोई गऊ माता न,माला पैरावे
बांरी गोदियां में नंदलाल, गऊ माता पूठरी घणी
जे कोई गऊ माता की आरती उतारे
बाने दर्शन देव भगवान, गऊ माता पूठरी घणी
जे कोई गऊ माता र काजलियो सरावे
बांरी ज्योत बढ़ावे गऊ मात, गऊ माता पूठरी घणी
जे कोई गऊ माता र मेंहदी लगावे
बांरो कोमल शरीर, गऊ माता पूठरी घणी
जे कोई गऊ माता रा खुरिया मंडाव
बांर घर आवे गोपाल, गऊ माता पूठरी घणी
जे कोई गऊ माता री महिमा गावै
बे तो भवसागर तिर ज्याय, गऊ माता पूठरी घणी
बे तो बैतरणी तिर ज्याय गऊ माता पूठरी घणी
No comments:
Post a Comment