श्री
कार्तिक के भजन,तुलसी जी का भजन
म्हे थान पुछां तुलछां राणी, कुण थारो मंदिर चिणायो ऐ
कुण थार मन्दिरइये की नो गज नींव दिराई ऐ
हळवा हळवा पांव धरो तुलछां क मंदिर आया ए
राधा है बा हर की प्यारी,बा म्हांरो मंदिर चिणायो ऐ
आप ठाकुर हर,नो गज नींव दिराई ऐ
मदरा मदरा पांव धरो,प्यारी क मंदिर आया ए
म्हे थान पुछां तुलछां राणी, कुण थारो बिड़लो रोप्यो ऐ
कुण थार बिड़ला न काचा दूधा सींच्यो ऐ
राधा है बा हर की प्यारी ,बा म्हारो बिड़लो रोप्यो ऐ
सांवरिया गिरधारी ठाकुर,काचा दूधा सिंच्या ऐ
हळवा हळवा पांव धरो...........
म्हे थान पुछां तुलछां राणी, कुण थारो ब्याव रचायो ऐ
कुण थार ब्याव को लग्न लिखायो ऐ
राधा है बा हर की प्यारी,बा म्हारो ब्याव रचायो ऐ
आप ठाकुर हर,लग्न लिखायो ए
हळवा हळवा पांव धरो.........
म्हे थान पुछां तुलछां राणी, कुण थारी जान जिमाई ऐ
कुण थारी जाना मांही लाड़ूडा गुड़ाया ऐ
राधा है बा हर की प्यारी,बा म्हारी जान जिमाई ऐ
आप ठाकुर हर लाड़ूड़ा गुड़ाया ऐ
हळवा हळवा पांव धरो.........
म्हे थान पुछां तुलछां राणी कुण थारी दात सँजोई ऐ
कुण थारी दातां मांही मोरां रुपिया घाल्या ऐ
राधा है बा हर की प्यारी,बा म्हारी दात सँजोई ऐ
आप ठाकुर हर मोरां रुपिया घाल्या ऐ
हळवा हळवा पांव धरो.........
धन घड़ी धन भाग म्हार हरजी मंदिर आया ऐ
हरजी म्हार मंदिर आया,माणक ,मोती ल्याया ऐ
पांव पड़न्तां पँखो ढ़ोल्यो,चरणां म शीश नवाया ऐ
गिरी ऐ छुंवारा, म्हार छप्पन मेवा ल्याया ऐ
पांव पड़न्त पँखो ढ़ोल्यो,चरणां म शीश नवाया ऐ
No comments:
Post a Comment